Энэхүү аялал нь хөгжилтэй, сонирхолтой, танин мэдэхүйн чиглэлийн, хүүхдүүд өөрсдөө бүх зүйлд идэвхтэй оролцох (унаанд өөрсдөө мөнгөө төлөн сууж, гуанз ресторан дэлгүүрээс хоол ундаа өөрсдөө сонгон авч, диснейланд руу өөрсдөө явж очих, япон хүмүүстэй чөлөөтэй уулзаж ярилцах ... гэх мэт) өвөрмөц аялал

Сургалт-аяллын зорилго, явц:

• Япон улсын хөгжил, соёл, зан заншил, хоол унд, хот суурингийн байдал зэрэгтэй танилцах. Хүүхдүүд өөрийн биеэр “харж, явж, оролцож, гайхаж бишрэн, тоглож наадаж, амталж үзэх ...” аялал юм
• Хүүхдүүдийг аялалд бие даалган гудамж хотын хөдөлгөөнд оролцуулж, япон хүмүүстэй уулзуулж, нөхөрлүүлнэ. Аяллын явцад эх орон, ээж аавтайгаа өдөр бүр интернэтээр дамжин шууд харилцаж, фэйсбүүкээр аяллынхаа талаар өөрсдөө мэдээлнэ

Аяллын ерөнхий хөтөлбөр:

• Токио хотоор аялна (Шинжюкү дүүргийн өндөр барилгуудын хорооолол, Шибүяагийн уулзвар, Эн-Эйч-Кэй телевиз, үнэнч нохой Хачикогийн хөшөө, Үэно дүүрэг ... гэх мэт газрууд)
• Токиогийн диснейландад тоглож, Үэногийн амьтны хүрээлэн үзнэ
• Ибараки мужийн Кога хот дахь “Яманака скүүл” соробангийн сургуулиар зочилж соробангийн түргэвчилсэн сургалтанд хамрагдан япон хүүхдүүдтэй уулзалт хийнэ
• Шинагавагийн усны амьтны хүрээлэн (аквариум) -д очиж, дельфины тоглолт үзнэ

Байр, унаа:

• Токиогийн Шинжюкүд РКК холбооны буудал, Үэногийн Кангэцүсо зочид буудалд, Ибараки мужид “Яманака скүүл” сургуулийн байранд тус тус байрлана
• Унааны хувьд цахилгаан тэрэг, метрогоор явна. Ибараки мужид аялах үед Яманака скүүл сургуулийн унаагаар үйлчлүүлнэ. (Хэрвээ далай руу аялах боломж гарвал Цүкүба хотын багш нар унаагаар үйлчилнэ). Япон руу МИАТ-ын шууд нислэгээр явна.

СУРГАЛТ-АЯЛАЛ болон 7-р сарын сүүлээр Токио хотноо болох СОРОБАНГИЙН ОЛОН УЛСЫН ОЛИМПИАД-ад Монгол соробан төвийн хүүхдүүд оролцох боломжтой. (Олон улсын олимпиадад тусгай шалгуураар оролцоно)

Сургалт-аяллыг одоогийн байдлаар 2 удаа:

1. 6-р сарын эхээр (6-р сарын 4-9 юм уу, 6-11-ний өдрүүдэд 6 өдөр 5 хоногоор)
2. 7-р сарын дундуур (7-р сарын 10-15-ны өдрүүдэд 6 өдөр 5 хоногоор) хийхээр төлөвлөж байна.

Сургалт-аялалд хүүхдүүдээ оролцуулах хүсэлтэй эцэг эхчүүд Д.Төмөрбаатар багш
(Утас: 99118960, Төмөрбаатар багш өөрөө хүүхдүүдийг хариуцаж авч явна)-аас төлбөр болон бусад тодорхой зүйлийг лавлаж, бүртгүүлнэ үү.

Соробан гэдэг бол монголчууды бидний хэлж заншсан сампин бөгөөд бөөрөнхий эрхийг нь нааш цааш болгон тоо боддог хэрэгсэл билээ.
Таван зуу орчим жилийн түүхийнхээ явцад Японы соробан нь тооцоолон бодох, цээжээр бодох чадварыг суулгах, тооны мэдрэмжийг сайжруулах гэх мэтээр хүний оюун ухааны хөгжилд ихээхэн нөлөө үзүүлэх “тооцоолон бодох соёл” болтлоо хөгжин өөрчлөгдөж иржээ.

Монголчууд бидний хэлж заншаад байгаа сампин гэдэг нэр нь хятад хэлний суаньпан (“тоо бодох хавтан” гэсэн утгатай) гэдэг нэр бөгөөд япон хэлэнд ч энэхүү суаньпан гэдэг нэр сунжран дуудагдсаар соробан болж орж иржээ. Өөрөөр хэлбэл, соробан болон сампин гэдэг нь суаньпан хэмээх хятад нэрний бага зэрэг өөрчлөгдсөн хувилбар, сампин нь Хятадаас Японд таван зуугаад жилийн өмнө буюу XVI зууны эхнээс нэвтрэн орж ирсэн юм. Хятад сампин нь нэг талдаа 5 эрхтэй, нөгөө талдаа 2 эрхтэй байдаг бол япончууд энэхүү суаньпанг боловсронгуй болгон нэг талдаа 4, нөгөө талдаа 1 эрхтэй болгон өөрчилж өнөөгийн боловсронгуй соробанг бий болгосон байна. Орчин үед тооны машин, компьютер зэргийг ашигладаг болсноор хүмүүс ямар нэгэн хэмжээгээр буруу хариугаас бултах, сэтгэн бодох үйл ажиллагаа нь зогсонги байдалд орох, хүн гэдэг сэтгэдэг “амьд организм”-ын өөрөө бодож шийдэх үндсэн чадвар алдагдах гэх мэтээр хүний уураг тархины үйл ажиллагаа сульдан доройтох болсон байна. Ийм учраас Японд соробан сампингийн хичээлийг сургуулиудад сэргээн оруулах болжээ. Хүний сэтгэн бодох, оюун ухааны үйл ажиллагааны үндэс болсон “цээжлэх”, “цээжээр бодох”, “анхаарал төвлөрүүлэх”, “уужуу тайвуу сэтгэх”, “тэвчээртэй байх” зэрэг чадварыг дээшлүүлэн сайжруулахад соробан асар их нөлөө үзүүлдэг. Аль болох бага наснаас нь, өөрөөр хэлбэл, эрдэм мэдлэгийн үндэс тавигдаж байгаа, насан туршийн дадал дүй төлөвшин тогтож байгаа, хүний оюун ухааны үйл ажиллагаа бүрэн тогтмолжоогүй (сэтгэн бодох чадвар уян зөөлөн) үед нь хүүхдүүдэд соробан сампинг зааж эхэлбэл тун үр дүнтэй.

Монголд 5 - 15 насны хүүхдэд соробанг заах нь зохимжтой гэж бид үзэж байна. Насанд хүрэгсэд ч, ялангуяа 50-иас дээш насныхан соробан сампингаар хичээллэвэл ой ухаан муудахаас сэргийлдэг сайн талтай. Япончуудын хэрэглэдэг уламжлалт соробангийн овор хэмжээ нь боломжийн доод хязгаарт тулгасан жижиг байдаг, эрхүүд нь ч жижигхэн. Соробан сампингийн жижиг эрхийг хурууныхаа үзүүрээр хөдөлгөн тоо бодох нь уураг тархинд сайнаар нөлөөлдөг, хуруу гарын мэдрэмжээр дамжуулан уураг тархины эд эсийн үйл ажиллагаа сульдах, ой ухаан доройтон муудахаас сэргийлдэг билээ.

Соробангаар хичээллэхийн ач холбогдол
Хүүхэд залуус оновчтой сургалтын хөтөлбөрөөр, зөв хичээллэх юм бол:

• тоо бодох, цээжээр бодох чадвар эрс дээшилж, уужуу тайвуу зан төлөвтэй болж, анхаарал төвлөрүүлэх, аливаа ажлыг оновчтой зохион байгуулах мэдрэмж чадвар сууна
• сэтгэлгээ уян зөөлөн, хөрвөмтгий болно

Жишээ нь: аливаа шийдвэрийг зохих цагт нь гаргаж чаддаг болно, соробангаар хичээллэсэн хүүхэд уураг тархи нь “уян, зөөлөн” болж, тэр нь аливаа шинжлэх ухаанаар хичээллэх сэтгэлгээний хөрс болох буюу өөр бусад шинжлэх ухаан руу шилжин хөрвөх чадварыг эзэмшинэ, гэх мэтээр олон талын ач холбогдолтой билээ.

Монголд соробан сампинг хүүхэд залууст сургах зорилгоор 2008 онд Монголын соробан сампингийн холбоо байгуулагдаад үйл ажиллагаагаа явуулж байна. Анх Соёл-Эрдэм сургуульд ажиллаж байсан Ямада багш, Канэтака багш нар Го-гийн холбоонд 2008 оны 5-р сард хүрэлцэн ирж, Го-гийн холбооны тэргүүн Д.Төмөрбаатартай ярилцан, Монголд соробан сампинг танилцуулан дэлгэрүүлэх үйл ажиллагаа явуулахаар тохиролцсон юм. Тэр үеэс хойш Ямада багш Сакүра сургууль, 54-р сургууль, Наран сургуулийн сурагчдад соробан сампинг заан, монгол хүүхдүүдийг олон оронтой тоог цээжээр хурдан хугацаанд бодох аргад сургаж эхэлсэн билээ.

Монголын соробан сампингийн холбооны үйл ажиллагааг Японы Элчин сайдын яам, Жайкагийн Монгол дахь салбар, Монгол дахь Япончуудын холбоо дэмжин ажиллаж байна. Мөн түүнчлэн Монголын соробан сампингийн холбоо Японы соробангийн холбоотой хамтран ажиллаж эхлээд байгаа бөгөөд Японоос соробан сампинг тусламжаар авч эхлээд байна.

Монголын соробан сампингийн холбоо 2009 оны 5-р сард Монголын соробангийн анхдугаар олимпиадыг Японы Элчин сайдын яамтай хамтран зохион байгуулсан билээ. Монголын соробан сампингийн холбооны багш Т.Ундаръяа Японы соробангийн Яманака скүүл сургуульд суралцан соробангийн 3-р зэргийн шалгалт өгөн тэнцэж, батламж авсан билээ. Мөн түүнчлэн тус холбооны тэргүүн Д.Төмөрбаатар, багш Т.Ундаръяа нар 2011 оны 2-р сард Японы Саппоро хотод зочлон Олон улсын математик соробангийн холбооны Японы хорооны удирдлагуудтай уулзан, багшлах эрхийн сертификат хүлээн авсан байна.

Монголын соробан сампингийн холбооны дэргэдэх “Монгол соробан” дамжаа 2011 оны 5-р сараас 7-р сар хүртэл “Наран” сургууль дээр сургалт зохион байгууллаа. Энэхүү сургалтанд “Наран” сургууль, “Эрэл” сургууль, 23, 33, 21, 2, 93-р сургуулийн сурагчид хамрагдан суралцаж, соробангийн 14-р кюү (зэрэг)-гийн болзлыг хангасан байна. Монголын соробан сампингийн холбооны урилгаар Японы соробангийн сургууль дамжааны холбооны дэд тэргүүн Яманака Коожи тэргүүтэй багш нар 2011 оны 7-р сарын 26-наас Монголд айлчлан монгол хүүхдүүд соробангаар хэрхэн хичээллэж байгааг үзэж сонирхоод, “сургалтын суурь маш зөв тавигдаж байна, монгол хүүхдүүд соробангаар хичээллэн өндөр амжилт гаргах чадвартай юм байна” гэсэн үнэлгээг өгсөн байна.

Монголын соробангийн холбоо цаашид соробангийн сургалт, арга зүйн талаар Японы байгууллагууд сургуулиудын тусламжийг аван үйл ажиллагаагаа улам чанаржуулахаар ажиллаж байна.

Жил бүрийн 11-р сард Монголын соробангийн холбоо, Японы улсын Элчин сайдын яамтай хамтран “Монголын соробан сампингийн олимпиад”-ыг зохион байгуулдаг уламжлалтай билээ. Энэхүү олимпиадыг Японы соробангийн холбоо, Японы соробангийн сургуулиудын холбоо байнгын дэмжигчээр оролцдог юм.

“Монгол соробан” сургалтын төвийн сурагчид энэхүү олимпиадад тогтмол оролцдог бөгөөд Монголын соробангийн II, III, IV олимпиадад манай сурагчид насны болон зэргийн ангилалд алт, мөнгө, хүрэл медалийг хүртэцгээсэн юм.

123NEXT